Malkolm Grant (30, 183), doputovao je večeras u Bar i već sjutra ga očekuje prvi trening u dresu Mornara a prvi meč odigraće protiv Skajlajnersa 12. decembra u 9 kolu Eurokupa.
Iskusni američki košarkaš minula tri mjeseca igrao je u Zadru, gdje je u ABA ligi imao prosjek od 11,9 koševa i 3,6 asistencija po utakmici.
Sezonu prije Zadra proveo je u redovima litvanskog Nevežisa i kazahstanske Astane. Ranije je nastupao i za slovenački Šentjur, švedski Norboten, kiparski Apoel, a četiri godine igrao je u Kanadi.
U meču sa Mornarom u 4. kolu ABA lige ove sezone (83:93), Grant je bio najefikasniji u redovima Zadra sa 22 poena (imao je i 4 asistencije, 3 uhvaćene i dvije ukradene lopte).
"Veoma mi je drago što sam u Baru. Imao sam priliku da igram protiv Mornara i uvjerio sam se da je to dobar tim. Jedva čekam da se upoznam sa saigračima i debitujem u dresu Mornara", kazao je po dolasku u Bar Grant, koji se, kao i svi njegovo prethodnici koji su ove sezone došli u Bar i zaigrali za Mornar, fotografisao ispred velikog postera šampionskog Mornara koji krasi hol dvorane "Topolica".
Pravo nastupa za Mornar u ABA ligi Grant će imati od meča sa Olimpijom (23. decembar), kada počinje drugi dio sezone regionalnog prvenstva.
